Una nga adlaw sang Cardiovascular Surgical Mission sa Corazon Locsin Montelibano Memorial Regional Hospital upod ang Philippine Heart Center ang ginsakdag sini nga adlaw.
Trese sa kabilugan ang nangin benepisyaro.
Ang pito ang una gin-operahan subong nga adlaw kag ang nabilin nga anum ka pasyente ang buas naman ipadailom sa operasyon.
Suno kay Dr Julius Drilon, ang Medical Center Chief sang CLMMRH, wala labot nga ini sila ang mga indigent, ang mga pasyente ang mga ginpili bangud sila ang labing nagakinahanglan sang surgical procedure.
Limitado man suno sa iya ang post operative care space sang ospital. 3 anyos ang pinaka huben nga pasyente kag 49 anyos naman ang pinaka may edad.
Samtang, naglagda man kaina sang aga sang memorandum of agreement ang CLMMRH nga gin tiglawas ni Drilon kag ang Philippine Heart Center nga gintiglawas ni Dr Joel Abanilla nga amo ang Executive Director.
Ini sa tinutuyo nga mahatagan sang nagakaigo nga traning kag pag panghanda ang CLMMRH kag mga duktor sini agudto nga mangin fully functional nga regional heart center.
Sa idalom sang Universal Health Care, suno kay Drilon na identify ang CLMMRH nga isa sa mga specialty centers kag ang cardiovascular care isa lamang sa ila nga labing gintutukan nila sa karon.
Paagi sini mas gina hatagan ang mga pumuluyo sang access sa advance nga health care kag mas gina palapit ang serbisyo sa publiko.
Naga pabilin ang heart disease nga leading cause of death sa pungsod sa datus sang Philippine Statistics Authority sang 2022.