10 percent nga increase sa emergency cost of living allowance ukon ECOLA sang kapin 6,000 ka manunudlo sa Bacolod ginduso sa konseho.
Sa pagtililipon sang mga public school teachers sa pagdumdom sang World Teachers’ Day gin-anunsyo ni Mayor Albee Benitez ang dugang nga increase sa ila sini ginabaton nga ECOLA.
Ginsiling sang alkalde nga indi malipod nga masami ang mga manunudlo pa ang naga-amot para sa improvement sang ila mga school classroom.
Gani ginduso niya madugangan pa ang tig-P2,000 nga ginabaton nga ECOLA sang kapin 6,000 ka mga public school teachers sa Bacolod City.
Kabahin ini sang rekomendasyon sang Committee on Education nga ginapamunuan ni Councilor Al Victor Espino sa konseho.
Nalakip sa ginalauman sang alkalde nga matigayon sa madasun nga tuig ang pag-install sang libre nga wifi sa mga eskwelahan.
Dugang diri ang pagtalana sang mga smart tv sa mga buluthuan agud mapasanyug pa ang mga programa sang siudad sa edukasyon.