Youth organization ginapabaskog ang kampanya angut sa human rights sa pungsod.
Tuyo sang United Nations Sustainable Development Solutions Network – Youth Philippines nga mapabaskog pa ang tingug sang mga kabataan bahin sa kampanya angut sa human rights.
Gani sa isa ka forum nga gintambungan sang mga local youth leaders sang Bacolod upod sa pamunuan sang Commission On Human Rights Negros Occidental kag Bacolod City Youth Development Office, naistoryahan ang mga tikang agud mapasanyog pa ang mga nagkalain-lain nga adbokasiya bahin sa reproductive health, gender equality, environment kag mental health kag iban pa nga may kaangtanan sa human rights.
Ginsiling ni UN SDSN senior program associate Renko Gaudiel, sa bulig sang mga youth leaders tuyo nga mabalay ang mga agenda kag sustainable development goals para sa human rights advocacy sa 2030.
Magluwas sa mga kaso sang red tagging, mga pagpamahug batuk sa mga youth leaders ginatagaan atensyon sang organisasyon ang bahin sa pagtapna sang disinformation nga naka-apekto sa imahen sang CHR kag sang pila pa ka mga human rights advocate sa pungsod.