Makusog nga pagbunok sang ulan sa kabukiran sa San Carlos City ang nagtuga sang pagbaha sa Brgy 1 kag 5 sang Domingo. Ang pagbaha nag guba man sa Medina Water Treatment Facility kun sa diin water supply sang 4,000 ka mga konsumedor ang na apektuhan.
Suno kay Joe Recalex Alingasa, ang pamuno sang Disaster Risk Reduction Management Office sang San Carlos City, kaagahon sang Domingo nag sugod ang pagbunok sang ulan nga nag resulta sang pag overflow sang Palampas River kag Andoon Creek.
45 ka balay sa Barangay 1 ang ginbaha kag 28 naman sa Barangay 5.
Pero tigayon man nga nag-subside gilayon ang tubig kag wala sang may gin-evacuate sa mga 300 ka pumuluyo nga ginbaha.
May isa man ka balay nga naguba bangud sang landslide sa Brgy Rizal.
Ginsiling ni Mayor Renato Gustilo nga ginakaayo sa karon ang Medina Water Treatment Facility kag iya na nga gina padasig ini.
Gina paabot nga sa tatlo tubtob apat ka adlaw mahuman ang pag kaayo sang water treatment facility nga naga produce sang 4MLD ukon million liters per day.
Mga 38 percent sang mga konsumedor sang amo nga treatment facilty ang naga eksperiensya sang low pressure to no water suno kay Alingasa.
Gina patuman naman ang water rationing sa mga apektado nga lugar sa karon.
“Restoration subong gina trabaho naton. Ang hambal sang engineer one week gid, so paningkamuton ta within 3 to 4 days maka resume na kita, temporarily lang ma install ang intake water tank para safety water ta, para maka operate ang aton water system”, suno kay Gustilo.