Sa tunga sang mabatyagan nga kainit sang panahon karon gina pasiguro sang Department of Education Western Visayas nga mapangapinan ang ikaayong lawas sang mga atleta nga karon nagapakig bahin sa Western Visayas Regional Athletics Association Meet.
Ginsiling ni Deped Western Visayas Spokesperson, Hernani Escullar nga nagapadayon ang hinampang sa karon sa WVRAA.
Pero kay mabatyagan man nila ang kainiton sang panahon, ila ginpakamaayo nga wala sang mga outdoor games humalin las 10 sang aga tubtob las 2 sang hapon.
May pag-ulan man kahapon nga na eksperiensyahan, ini ang ila gina abi-abi bangud naka dala sang alibyo sa kainiton sang temperatura.
Kun may mga naglain man sang pamatyag sa WVRAA ini ang kabahin na sang hinampang.
Gina pasiguro sang DepEd nga prayoridad sa amo nga pagtilipon ang ikaayong lawas sang mga atleta.
Suno kay Escullar istrikto man nila nga gina sunod ang mga naka saad nga guidelines.
Kaangay sa mga contact sports kasubong sang boxing kag wushu nga kun wala sang may naka standby nga ambulance indi sarang makapatigayon sang kasubong nga mga hinampang.
“To ensure ang safety sang tanan, especially sa tama kainit sini nga panahon especially during midday, like sa football wala sila nagbutang sang schedule at around 10 am until 2pm. Kay gina emphasize gid sang aton regional director that the health of our athletes is of utmost priority, second dira ang aton mga hinampang”, suno kay Escullar.