Amo sini ang sitwasyon sang basura sa atubang mismo sang isa ka simbahan sa Barangay Handumanan sa Bacolod City kun sa diin ginpahamtang ang garbage bin.
Ginareklamo sang simbahan ang paghimo sang amo nga lugar bilang dumping site bangud nagabaho ini, ilabi na may mga diapers kag patay nga sapat pa nga ginahaboy diri ang mga residente.
Amo man sini ang sitwasyon sa porsyon sang Barangay 7, malapit sa daan nga planta sang softdrink.
Nanindugan si Bacolod Environment and Natural Resources Officer Atty. Allyn Luv Dignadice nga epektibo ang garbage bin nga ginpahamtang sa mga barangay, apang problema sa gihapon ang mga residente nga wala nagasunod sa mga patakaran nga ginapatuman sang siudad.
Suno sa iya, kalabanan sa mga reklamo amo ang mga basura nga wala man ginahaboy sa sulod sang garbage bin bangud tam-an ini kataas.
Sang ginbutangan na sang hagdanan sang siudad ang mga garbage bins, ginpangkawat man ini sang mga kawatanan suno sa iya.
Ginapangabay sang siudad ang mga kapitan nga kinahanglan magbutang sila sang ila personnel nga 24 oras magabantay sa dumping site sa ila tagsa ka barangay.
Ini ang suno kay Dignadice nakasaad sa ila nga kasugtanan sa mga punong barangay antes pahamtangan sang garbage bins ang ila lugar.
Sa karun may 13 na ka garbage bins nga ginpahamtang ang BENRO sa mga dalagko nga barangay.
[sibwp_form id=1]