![](https://i0.wp.com/digicastnegros.com/wp-content/uploads/2023/10/wp-1697198081148.jpg?resize=810%2C456&ssl=1)
Mga vendors sa Manokan Country nga wala nagabayad sang utang sa siudad ang mahimo i-blacklist man sang katapo sang Local Market Committee sa mga awardees para sa ginaplano nga bag-o nga manokan.
Kasubong sa mga market vendors nga wala nagabayad sang utang sa siudad, mahimo i-blacklist man sang katapo sang Local Market Committee ang pila ka mga tenants sang Manokan Country nga asta subong wala nagatuman sang kasugtanan para mabayaran ang ila tinuig na nga utang.
Sa record sang komitiba, may walo lang sa 27 ka mga tenants nga na-issuehan sadto sang notice to pay kag notice to vacate ang nagabayad sang ila bulanan nga utang para sa renta sa mga stalls. Suno kay City Legal Officer Atty. Romeo Carlos Ting, Jr., mabudlay nga tugutan lang pirmi ang mga tenants kag market vendors nga indi magbayad sang utang bangud masami sila pa ang una nga naga-reklamo kun may pa-raffle sang mga pwesto sa mga baligyaan sang siudad.
Nagalaum si Ting nga karon nga ginasaulog ang MassKara Festival kag asta sa bulan sang Disyembre matigayon na nga maka-settle sang ila balayran ang mga tenants sang Manokan.