Indi na kinahanglan pa nga magpila ang isa ka benepisyaryo sang UPLIFT Assistance agud makuha ang benepisyo, bangud pwede na ini mabaton pinaagi sa GCash.
Nangin pilot city ang Bacolod sang UPLIFT Assistance Digital Payout nga inisyatibo sang Department of Social Welfare and Development.
Martes sang aga, ginpangunahan ni DSWD Secretary Rex Gatchalian ang launching kun sa diin 62 ka mga benepisyaryo ang una nga nagbaton sang digital payout.
Suno kay Gatchalian, luyag nila masiguro nga direkta mabaton sang benepisyaryo ang assistance kag mas mangin madasig na ang paghatag sang ayuda.
Karon, yara pa lang sa 20 porsyento sang 2.5 million beneficiaries nga yara sa idalum sang poor kag near poor households ang may yara sang GCash accounts.
Ginahaylo sila sang DSWD nga mag-process na sang ila Gcash accounts agud mas mangin madasig na ang ila pag claim sang assistance.
Sa mga wala pa sang account, sa tagsa ka payout center may yara sang pwede nga maka assist sa ila agud mangin digital na ang ila sunod nga pag claim.
2,000 pesos ang mabaton sang mga beneficiaries sa kada bulan tubtob sa Disyembre sini nga tuig.
Magluwas sa ini nga category, kwalipikado man ang mga 4Ps kag walang gutom program beneficiaries, apang makaisa lamang sila makakuha sang 2,000 pesos. Amo man ang mga SSS members nga wala makadangat sa 20,000 pesos ang sweldo kag aktibo ang contribution.
[sibwp_form id=1]