Ginsugdan subong nga Martes ang pag kalkal sang mga balas kag bato nga nagtampok liwat sa Ibid Creek sa Barangay Biak na Bato sa La Castellana.
Ang mga heavy equipment nga ginpadala sang probinsya sang Negros Occidental amo ang ginagamit para mag hawan balik ang Ibid Creek. Sang Setyembre 15, liwat nga nag awas ang Ibid creek kasunod sang mabunok nga ulan.
Suno kay Punong Barangay Joselito Martinez, Jr., ang mga nakalkal nga bato kag balas ibutang lamang sa kilid. Sa nag ligad nga tuig ginhawanan man ang creek bangud sang pag katampok sang mga balas kag bato nga gin anod sang ulan gikan sa naibabaw nga bahin.
Nalakip na diri ang mga abo kag volcanic debris nga ginbuga sang bulkan Kanlaon. Indi ma-negar nga sulit-sulit ang sitwasyon.
Naga pasalamat si Martinez sa bulig nga ila nabaton sa tunga sang ila nga sitwasyon.
Sa pihak nga bahin, naga pabilin nga light vehicles lamang ang maka labay sa calapnagan bridge. Ginahulat ang equipment sang DPWH suno kay Martinez. Nag hinyo naman sila sang assistance gikan sa PNP nga ma assign sa area sa pag pasiguro nga masunod nga light vehicles lamang ang maka agi.
“Gina pahigad lang gid, pero okay man makabulig man, pero kun mag daku ang tubig sa babaw same man gihapon. One year na nga gina amo na naton, balik balik lang gid. Pero maka bulig gid man, indi bala dali-dali maka penetrate gwa ang tubig tungod nga nag dalom naman siya,” suno kay Martinez.
[sibwp_form id=1]