Updating sang records sang mga member-consumer sang Central Negros Electric Cooperative sa Bacolod suguran sa mall sa Hulyo 19, kasubong man sa lima pa ka areas of coverage sang distribution utility. Sa Miyerkules suguran sang CENECO ang updating sang records sang masobra 190,000 ka mga member-consumer.
Gani magatalana sila sang coordinators sa Ayala Mall halin July 19 asta 27 nga sarang kadtuan sang mga member-consumer.
Suno kay CENECO Acting General Manager Atty. Arnel Lapore, kabahin ini sang mandu sang National Electrification Administration may kaangtanan sa hinyo sang mga alkalde nga malimpyuhan ang voters’ list sang mga member-consumer para sa patigayunon nga plebisito sa Joint Venture Agreement sang Ceneco kag Primelectric Holdings Incorporated.
Ang updating sang account information available man sa CENECO offices sa Bacolod kag sa Talisay, Silay, Bago kag Murcia.
Samtang, ginahulat pa sang CENECO ang pagtalana sang NEA sang schedule para sa plebisito makaligad man sang ginpapanaug sini nga temporary suspension para sa cleansing sang voters’ list.