City Legal Office maga-imbitar sa towing service kag traffic personnel angut sa gina-alegar komisyon nga ginahatag para sa towing kag clamping operation.
Ginklaro na ni Bacolod Traffic and Transportation Management Department Deputy Jose Antonio Robello nga wala sila nagbaton sang komisyon gikan sa Metro Towing Services.
Taliw-as ini akusasyon sang anay traffic area supervisor nga si John Rey Sarona batuk sa pamunuan sang BTTMD nga nagahatag sang porsyiento ang towing service. Ginklaro ni City Legal Officer Karol Joseph Chiu nga ginadumilian ang government employee kabahin na diri mga traffic personnel nga magbaton sang komisyon ukon bisan ano nga sahi sang regalo kabaylo sang ila katungdanan sa pagpatuman sang towing kag clamping operation sa siudad.
Ang City Legal Office ang naga-imbitar sa tagdumalahan sang towing service kag sa anay area supervisor agud ma-validate ang alegasyon. Ginpabutyag sadto ni Robello nga nag-ugat ang reklamo ni Sarona batuk sa ila matapos nga nakakas siya sa listahan sang job order workers tungod sang work ethics kag pagpamahug nga maga-rally siya kun indi madala sa listahan sang Plantilla workers sang siudad.