Arestado ang isa ka helper sa hardware store nga ika-walo sa listahan sang Most Wanted Persons sa bilog nga Negros Island Region.
Gindakup si John Whel Gordoncillo, 29-anyos, sang Dumaguete City.
Ginpatigayon ang operation sa Purok Kahirup B, Barangay Mansilingan sa siudad sang Bacolod, Huwebes sang gab-i.
Base sa report sang PNP, may warrant of arrest si Gordoncillo sa kaso nga pagbaligya kag paghupot sang iligal nga droga.
Ang warrant of arrest ni Gordoncillo ang gin-isssue ni Judge Chloe Hope Trinidad-Abastillas, sang Regional Trial Court, Branch 30 sa Dumaguete City sadtong Marso 6, 2025.
Suno sa PRO-NIR, naka-agi na sadto dakup ang suspek sa buy-bust operation sa Dumaguete apang siya ang ginbuy-an matapos maka-avail sang probation.
Apang, na-cancel ang probation, rason nga nagpagwa ang Korte sang arrest warrant para sa service sang orihinal nga sentensya sang suspek.
Ginpatigayon ang operation sang katapo sang Bacolod Police Station 7, Regional Intelligence Unit sang NIR, Dumaguete Police Station Tracker Team kag Bacolod City Police Office Tracker Team.
Gindayaw ni PRO-NIR regional director Arnold Thomas Ibay ang mga operatiba sa pagdakup sa wanted nga persona, bilang kabahin sang ila Simultaneous Anti-Criminality and Law Enforcement Operation (SACLEO), nga nagatuyo magdakup sang mga indibidwal nga may arrest warrant, mag-kumpiskar sang iligal nga droga, magpaguba sang drug networks kag magpa-untat sang supply chain sang iligal nga droga.