Ginlabo sang makapila ka beses sang hinablos ang iya nga tiyo rason sang iya kamatayon sa Purok Kinabong, Barangay Minoyan sa banwa sang Murcia, sadtong Martes, Hunyo 16, apang sang Huwebes na na-report ang insidente sa kapulisan.
Nag-gwa sa imbestigasyon nga naglalisay ang biktima nga si alyas “Antonio”, 55-anyos kag ang iya hinablos nga si alyas “Ruel”, 19-anyos bangud sa ginpangtapas nga kahoy sang suspek.
Ginpahog sang biktima ang iya hinablos nga kun padayunon niya ang pagpang-utod sang mga kahoy, may matabo nga pag-agay sang dugo sa tunga nila.
Apang sang mga las 10 sang gab-i, naglakat ang suspek sa balay sang biktima dala ang binangon. Ginhulat niya ang iya tiyo kag ginlabo-labo, antes nalagyo.
Miyerkules sang aga, nadiskubrehan sang manghod sang biktima ang duguon nga lawas sang iya utod. Nagpatigayon sang hot-pursuit operation ang mga pulis kag nadakpan ang suspek.
Nagdesisyon naman ang pamilya nga ilubong na ang ang bangkay sang biktima kag indi na magpasaka sang kaso batok sa suspek.
[sibwp_form id=1]