Tinguhaan sang probinsya sang Negros Occidental nga ma comply ang gina hinyo nga logistics kag iban pa nga preparasyon nga luyag sang Office of the Civil Defense enkaso magsaka sa Alert Level 4 ang sitwasyon sa bulkan Kanlaon.
Ginsiling ni OCD administrator, USEC Ariel Nepomuceno, nga indi lahug-lahug ang mag evacuate sang 110,000 ka persona kun tigayon gid man magsaka sa alert level 4.
Gani ang detalye sang amo nga plano ang ila na nga luyag nga mapat-od bagay nga suno sa gobernador tinguhaan nga ma comply. Sa kadamuon sang ma apektuhan, mga dalagko nga buses ang kinahanglan kun matabo suno kay Lacson.
Pero magluwas sini, ang luyag nga maklaruhan nila sa OCD ang bahin sa aspeto sang seguridad sa tent city nga amo ang concern ni Mayor Rhummyla Nicor Mangilimutan sang La Castellana, kasubong man ang pag pakaon sa mga evacuees.
Samtang, ginkasugtan nga sa pagkaon man gamiton ang 50 million pesos nga damlag pa gin release sang Malacanang sa probinsya. Suno kay Lacson ginahulat na lamang nila ang deed of donation nga malagdaan bahin sang Malacanang.