May 981 ka bag-o nga HIV (human immunodeficiency) cases nga na report sa Pilipinas sang bulan sang Setyembre sin inga tuig.
Pang-apat ang Region 6 nga nag record sang 64 ka bag-o nga kaso sang HIV sa amo nga bulan sandig sa report sang Philippine Society for Microbiology and Infectious diseases – Western Visayas.
Humalin naman sang Enero tubtob sa Setyembre nga datus, 8,945 ang new HIV cases sa pungsod.
Pero ginapatihan nga ini ang under reported bangud sang stigma dala sang HIV/AIDS, kakulang sang access para sa testing sa pila ka mga probinsya sa pungsod kag ang epekto man sa mga health services sang Covid-19 pandemic.
Padayon ang pagsaka sang HIV cases sa pungsod. Sang 2011, may 6 ka average nga bag-o nga kaso sang HIV sa kada adlaw, sang 2020 nagsaka sa 22 ang average nga bag-o nga kaso sa matag-adlaw. Pero sini nga 2021, nagdangat na sa 33 average new cases sa matag-adlaw.
Sa Pilipinas, 81 percent sa HIV infection ang na transmit paagi sa male to male sex, sa male to female sex naman, 15 percent. Humalin naman sang 1984 tubtob Setyembre sini nga tuig 29 percent sa mga gin report nga HIV cases naga pang edaron 15-24 anyos. HIV testing lakip na early diagnosis ang gina duso. Suno sa Philippine Society for Microbiology and Infectious Diseases – Western Visayas, wala sang ika huya para sa HIV testing.
Ang mga naga pang edaron 13 tubtob 64 anyos, dapat naka paidalom bisan sa maka isa lamang ka bes sa HIV testing, amo man ang mga yara sa monogamous nga relasyon bisan pa ang mga naga busong. Ginahaylo man ang mga sexually active gay ukon bisexual nga mag pa test sa kada 3 ukon anum ka bulan.
Regular man nga mag pa test ang may high risk behavior. Angut sa World AIDS day commemoration, may libre nga HIV testing nga gina tanyag karon sa SM mall tubtob sa Disyembre 12.