Sang Biyernes gin-issue na sang Bacolod City Legal Office ang show cause order batuk sa tatlo ka mga empleyado sang Office of the Building Official, nalakip diri duha ka mga engineer nga nagaserbe building inspectors kag job order worker.
Ginpahayag ni Mayor Albee Benitez, on duty pa ang mga regular employees pero wala anay sila gintagaan sang trabaho samtang gina-usisa ang alegasyon sang pagpangilkil nga ginpadangat sang tagreklamo nga negosyante batuk sa ila.
Sa sulat nga ginpalab-ot sang mga building inspectors kay City Legal Officer Atty. Romeo Carlos Ting, Jr., ila ginpanginwala ang alegasyon sang tagreklamo nga nangayo sila sang P5,000 para mapadasig ang ila pagkuha sang clearances sa OBO para sa business permit application.
Pero ginsiling ni Ting nga may CCTV kag cellphone video ang tagreklamo sang pagbaton nila sang kwarta.
Magluwas sa OBO, ginpausisa man sang alkalde sa National Bureau of Investigation-Bacolod ang mga empleyado nga mahimo may kahlabtanan sa pagpameke sang gina issue nga business permit.