Task Force Disiplina ang nagpaandam sa mga depasahero nga bus kag jeep gikan sa norte nga bahin sang Negros Occidental nga nagasulod sa Bacolod nga magsunod sa mga minimum health protocols sang siudad.
Gin-updan sang mga pulis kag traffic enforcers ang mga katapo sang Task Force Disiplina sa pagbantay sang mga depasahero nga bus kag jeep nga nagasulod sa boundary sang Bacolod kag Talisay.
Ila ginapahanumdum ang mga drivers kag pati na mga pasahero nga magsunod sa ordinansa sang Bacolod nga nagamando sang pagsuksuk sang face mask kag face shield sa mga pampubliko nga lugar kag salakyan.
Dapat man nga 50 porsiento lang sa maximum seating capacity sang salakyan ang mga nagasakay nga pasahero.
Ang pagsupak sa city ordinance 966 kag 944 ang may dala nga nagakaigo nga multa sa sinoman nga magsupak sini, taga bacolod man ukon indi.