Bilog nga napulo ka mga kongresista sang Negros Island Region ang nag lagda sang impeachment complaint kahapon batuk kay Vice President Sara Duterte. 5th District Representative Emilio “Dino” Yulo ang naglagda sa impeachment complaint pagkatapos na ma adjourn ang session sang House of Representatives.
215 tanan ka mga kongresista ang naglagda sa impeachment complaint kontra kay Vice President Duterte base sa na transmit sa Senado para trial. Nalakip diri sanday Representatives, Gerardo Valmayor (1st District), Alfredo Maranon, III, (2nd District) Abang Lingkod Partylist kag 3rd District caretaker, Stephen Paduano, Juliet Marie Ferrer (4th District) kag Mercedes Alvarez (6th District) sang Negros Occidental, Jocelyn Limkaichong (1st District)kag Manuel “Chiquiting” Sagarbarria (2nd District) sang Negros Oriental, Zaldy Villa Lone District sang Siquijor kag Greg Gasataya, Lone District sang Bacolod.
Suno kay Paduano, nagkit-anay sila kahapon ni Yulo matapos ma adjourn ang session kag iya nakumpirma kay Yulo nga ini ang naka lagda. Wala makasabat si Yulo sa mga tawag sang katapo sang media.
Klaro ni Paduano, magluwas kay Yulo may iban pa gid nga nag dugang lagda matapos ang adjournment.
Pero as of press time indi niya mapat-od kun pila ang kabilugan na nga naglagda. Paathag ni Paduano sa 215 ka pirma nga nabaton sang senado nalambot na ukon sobra na ini sa 1/3 nga gina kinahanglan base sa rules of impeachment.
Wala man madala sa na transmit sa Senate ang mga nagdugang sa 215 ka mga pirma ang importante suno kay Paduano nga sa record sang House of Representatives nalakip ang mga pirma nila sa Articles of Impeachment.
Paathag ni Paduano, kun ngaa nagduso sila sang impeachment bangud nalakip ini sa ila nga katungdanan labi na nga nabalhag ang tanan sa ginpatigayon nga hearing sang kamara.
Na cite sa complaint kontra sa bise presidente ang culpable violation of the constitution, betrayal of public trust, graft and corruption kag iban pa gid nga gina kabig high crimes.
“Ang pamangkot da, kun patulugon namon na, kag indi namon pag aksyonan, kami ang may problema sa tawo. Amo na ya guro may political backlash”, suno kay Paduano.