Viral sa social media ang post sang netizen nga taga Barangay Zone 1 sa Talisay City nga si Rizza Jereza.
Makita sa CCTV video ang pagsulod sang duha ka mga lalaki sa ila nga propiedad.
Gintabunan pa sang duha ang CCTV sa may gate dampi antes nagtaklas pasulod.
Ang isa sa ila ginhimo niya nga tabon sa iya nga guya ang gin uba niya nga t-shirt samtang ang iya naman nga kaupod ang naka hoodie kag wala sang tabon ang guya.
Base sa post, naka singgit ang tagbalay sang maglili sa bentana ang isa sa mga suspek.
Suno sa kay Police Lt. Col. Salvador Trono Jr., ang hepe sang Talisay PNP, wala man sang may nakuha ang duha kag wala man mahibaluan kun ano gid ang tinutuyo nila pero gina usisa na sang PNP kun sin-o ini sila kag kun ano ang ila nga background.
Panawagan sang PNP, dumdumon pirme ang seguridad sa propiedad kag kun may mga kasubong sini nga insidente gilayon itawag sa pulis ukon sa barangay para ma aresto.