Estable na ang supply sang kuryente sang Alijis Feeders 1 kag 3 matapos ang halos lima ka adlaw nga patay andar sang kuryente humalin sang naglupok ang 13-anyos nga transformer sa Alijis Substation.
Suno kay Negros Power Corporation President kag Chief Executive Officer, Roel Castro, Lunes sang aga sang na restore ang power supply sa amo nga mga feeders.
Sang Sabado sang nag abot ang 10MVA nga mobile substation nga ginpadala diri sa Bacolod halin sa More Power Iloilo.
Ang ini nga mobile substation ang may kapin 12 megawatts nga kuryente samtang yara lang sa 9.3 megawatts ang kinahanglan sang Alijis Feeder 1 kag 3 agud mangin stable ang power supply.
Gin tie-up ang Alijis feeder sa malapit nga mga feeders para maka bulig pa gid dugang sang power supply.
Bangud sini, wala na sang rotational brownout humalin sang Lunes sang aga.
Suno kay Castro, anum sa 11 ka mga transformers ang naga kinahanglan nga ma rehabilitate bangud daan na.
Ila ini nga amat-amaton. Indi man siya makapasalig nga wala na sang mga brownout bangud malawig nga proseso ang kinahanglan para tigayon nga maislan ang tanan nga mga pasilidad nga naga kinahanglan nga ma rehabilitate.