Nagahamboy sa masobra P2,600 na lang ang kada sako sang raw sugar sa pila ka mga sugar mill sa probinsya.
Gani nagpadala na sang sulat ang mga sugar planters association halin sa Luzon nga nagahinyo sa Department of Agriculture kag Sugar Regulatory Administration sang intervention sa pagsarurot sang presyo sang kalamay.
Ginpahayag ni SRA Administrator Pablo Luis Azcona nga wala pa siya sang may nabaton nga sulat halin sa mga sugar association pero tungod sang kahangawa sang kadam-an nga mga sugar producers plano nila nga i-hold anay ang supply sang kalamay sa Enero.
Ini agud magsaka ang demand dugang sa pagsaka sang mill gate prices.
Gindugang ni Azcona nga indi malipod nga bisan makapila niya ka beses nga ginpahayag nga wala sang oversupply sang kalamay, wala gihapon nagasanto ang mataas nga presyo sang kalamay sa merkado sa manubo nga mill gate prices nga naga-apekto sa palangabuhian sang mga sugar planters ilabi na mga small sugar farmers.
Ginpasalig ni SRA Planter Representative David Sanson nga handa ang SRA nga magpalab-ot sang ayuda sa mga sugar farmers nga sarang ma-apektuhan kun matigayon ang pag-hold sang supply sang raw sugar sa sulod sng tatlo ka bulan.