Duha ka commercial establishment ginpaandaman sang matukiban nagabaligya sang sub-standard nga Christmas decors sa joint inspection sang Bureau of Fire Protection.
Duha sa anum ka mga commercial establishment sa downtown area nga gin-usisa sang katapo sang Bureau of Fire Protection, Department of Trade and Industry kag Business Process and Licensing Office upod sa kapulisan ang natukiban nagabaligya sang sub-standard nga Christmas lights kahapon.
Gani gilayon nga ginpakuha ang mga decors nga wala sang PS mark kag ICC stickers kag ginpaandaman ang tagdumalahan angut sa pagbaligya sang sub-standard product.
Ginpahayag ni BFP City Fire Marshall Fire Superindentent Jenny Masip, importante nga masiguro nga santo sa standard ang ginagamit nga Christmas lights kag decors sang mga bumalakal agud mapaiway ang posible pagluntad sang sunog ilabi na karon nga paskwa.
Magapadayon ang joint inspection sang BFP, DTI kag BPLO sa pila pa ka mga commercial establishment sa siudad. Bwas, magapatuman man sila sang fire drill kag inspection sa baligyaan sang palupok sa reclamation area.