Wala anay nag-protesta sa dalan ang katapo sang Kabacod Negros Transport Coalition.
Sa baylo, nagpadulong sila sa talatapan sang Land Transportation Office agud mag-apelar nga tagaan konsiderasyon ang ila padayon nga pagbyahe sang ila mga traditional jeepney.
Ini bisan ginakabig na sang Land Transportation Franchising and Regulatory board nga colorum ang mga traditional jeepney unit nga wala nagpaidalom sa franchise consolidation.
Sa paghinun-anun sang grupo kay anay LTFRB VI Regional Director Richard Osmeña kag Vice- Mayor El Cid Familiaran, ila ginhinyo nga mapabilin anay ang status quo bisan pa nagtakop na ang deadline para sa application sa franchise consolidation sang nagligad nga Abril 30.
Ginsiling ni Lilian Sembrano, presidente sang KNETCO nga kuntani tugutan ang status quo samtang ginasuguran na ang ginpanawagan nila nga congressional inquiry angut sa ginapatuman nga jeepney modernization program.
Si Vice Mayor Familiaran amo sadto ang personal nga nagpadala sang resolution sang konseho agud ihinyo sa kongreso kag senado ang pag-review sang jeepney modernization program.
Suportado sang bise-alkalde ang panawagan sang grupo para sa isa ka status quo agud indi lubos nga maapektuhan ang palangabuhian sang mga apektado nga traditional jeepney drivers kag operators sa siduad.