Kasunod sang deklarasyon sang Negros Occidental sang state of calamity, Sugar Regulatory Administration ang nagsugod na sa ila nga procurement process para sa pesticides kontra sa RSSI ukon sa peste sa tubo.
Ini suno kay SRA Board Member Dave Sanson nga pamuno man sang RSSI Task Force.
Iya ginsiling nga ila na nga gina kumpleto ang mga kinahanglanon nga dokumento lakip na ang mga specifications agudto gilayon nga ma procure ang mga pesticide para naman mapanagtag sa mga sugar farmers.
Sa August 1 nga report sang SRA, 3,184.39 hectares sang katubuhan ang apektado sang red striped soft scale insects ukon RSSI sa Negros Occidental.
Ilakip ang mga areas nga apektado sa Negros Oriental, Iloilo, Capiz kag Leyte, 3,284.8 ka ektariya ang apektado sang peste.
May 1,831 ka mga mangunguma ang apektado sang RSSI.
Gina reduce sa tubtob 50 percent sang amo nga peste ang sugar content sang tubo.
Samtang, sang nagligad nga semana sa pag abot sang Israeli Consul nga si Moti Cohen sa Negros Occidental ginpahayag niya nga may expert gikan sa ila nga pungsod nga maga abot sini nga semana sa probinsya para mag paalinton sang iya ihibalo para mapamatukan ang amo nga sahi sang peste sa tubo.
