Pamunuan sang Sugar Regulatory Administration nagmando sang cane sampling sa mga talamnan sang tubo nga apektado sang ash fall.
Tuyo ni SRA Administrator Pablo Luis Azcona nga mapat-ud ang epekto sang ash fall gikan sa naglupok nga Bulkan Kanlaon sa mga talamnan sang tubo.
Gani iya na ginmanduan ang katapo sang research and development para tagaan prayoridad ang pagkuha sang sampling sa mga tubo nga naigo sang abo.
Kalabanan sa mga lugar nga apektado ang yara sa Central Negros, nalakip diri ang banwa sang La Castellana, Moises Padilla, Pontevedra kag La Carlota City.
Kalakip sa natalana nga cane testing ang pagkakas sang mga abo sa mga dahon sang tubo.
Gindugang ni Azcona nga makabig na nga acidic ang kondisyon sang mga talamnan gani luyag nila nga madula ang kabalaka nga mas nagsaka ang acidity sang mga tubo sa mga apektado nga lugar.
Dungan sini ang SRA ang nagtalana sang P2M nga pondo para sa ayuda sang apektado nga mga LGU’s kag dugang nga P500,000 para sa ipatuman nga medical mission.