Unopposed SK federation president nagpungko na sa konseho sang siudad sang Bacolod Ginsuguran na kaina ni outgoing Bacolod City SK Federation President Ayesha Joy Villaflor ang pagpanghimos sang opisina sa Bacolod City Government Center para sa magatal-us sa iya nga si incoming SK federation President Danna Marie Barzo nga napili bilang bag-o nga pamuno sang SK Federation sa siudad.
Si Barzo nga naga serbe man nga SK chairperson sang Barangay Mandalagan ang wala sang kontra sang ginpatigayon ang pinili-ay kahapon.
Siya ang magasugod man sa pagserbe bilang ex-officio member sang konseho sang siudad. Napili naman nga Vice-president si Catherine Trespuentes sang Barangay Felisa, Secretary si Darlwin Sales sang Barangay 6, Treasurer si Kaye Alyana Ilon sang Barangay Cabug, Auditor si Jake Demegillo sang Barangay 14, PIO si Bea Kryshia Pabular sang Barangay Taculing kag sergeant- at-arms si Aldrich Borda sang Barangay Sum-ag.
Ginalauman ni Villaflor nga sa pagpamuno ni Barzo mapadayon ang paghatag atensyon sa mga pagpatuman sang reporma sa SK kag subong man mapabaskog ang kampanya para sa mental health program kag opportunidad sa trabaho para sa mga pamatan-on.