Shadow

Siudad sang Bacolod kag Iloilo LGU handa na nga magbukas sang pwerto para sa commercial trips pero wala pa mahibaluan kun san-o magbalik operate ang mga fast craft kag roro vessels

May yara na sang executive order si Bacolod Mayor Evelio Leonardia kag Iloilo Mayor Jerry Trenas nga nagapahanugot sa pagbaton sang mga pasahero gikan sa duha ka mga siudad nga lunsay yara sa General Community Quarantine status.

Pero tubtub subong wala pa mahibaluan kun san-o magbalik ang commercial trips sang mga fast craft kag roro vessel operators bangud wala pa sang pahanugot gikan sa MARINA.

Suno sa fast craft operator nga si Frank Carbon, nagsapol kahapon ang MARINA, Philippine Coast Guard, Philippine Ports Authority kag mga tiglawas gikan sa mga siudad kag probinsya sa Western Visayas pero wala makatambung ang tiglawas gikan sa mga probinsya sang Guimaras, Capiz, Aklan kag Antique.

Ginpahayag ni Carbon nga handa na nga magbaton sang mga pasahero gikan sa iban nga lugar ang Bacolod City, Iloilo City kag probinsya sang Negros Occidental basta pagasundon lang ang minimum health protocols pero ang tiglawas sang Iloilo province ang magapangita pa sang mga requirements kasubong sang medical certificate, travel authority kag notice of coordination gikan sa mga Locally Stranded Individuals para makasulod sa ila probinsya ang mga gikan sa Bacolod kag Negros Occidental.

Bangud kulang sang tiglawas gikan sa apat ka mga probinsya, wala sang ginkasugtan nga petsa kun san-o ibalik ang mga commercial trips sa mga pwerto.

Nagdesisyon ang grupo nga itugyan na lamang sa Regional Inter-Agency Task Force ang paghimo sang uniform travel policy para sa Western Visayas bangud tagsa ka mga local government unit ang may nagkalain-lain nga mga pagsulundan sa pagbaton sang mga pumuluyo gikan sa iban nga lugar.

Nagapati si Carbon nga handa na ang Western Visayas sa pagbukas sang mga negosyo bangud kinahanglan nga mabuhi ang lokal nga ekonomiya.

Nagaduso man siya sa RIATF nga magtukod sang isa ka economic recovery program para mabuligan ang ekonomiya sang rehiyon nga makabangon sa epekto sang COVID-19 pandemic.

Leave a Reply

Your email address will not be published. Required fields are marked *

Secured By miniOrangeSecured By miniOrange