Simultaneous lights-off ceremony para sa Earth Hour natalana hiwaton sa Bacolod City Government Center bwas, Sabado.
Sa sanitary landfill sa Barangay Felisa nag tree planting ang katapo sang Bacolod City Climate Change and Environment Council kaupod ang katapo sang academe kag Bacolod Environment and Natural Resources Office. Ginsiling ni BENRO head, Ma. Fe Trespuentes kabahin ini sang pagdumdom sang International Forest Day celebration kag sa natalana nga pagdumdom sang Earth Hour.
Bwas sa aga natalana ang isa ka programa nga pangunahan sang katapo sang Negrosanon Initiative for Climate and Environment upod sa BENRO sa Bacolod City Government Center.
Pagasundan ini sang simultaneous switch off ceremony ukon pagpatay sang mga electrical equipment nga nagasimbolo sang kampanya para mapangapinan ang palibot kag mapasanyog ang energy conservation.
Magasugod ini las otso y media sang gab-i asta las nuebe y media. Malapit isa ka libo nga mga volunteers kag katapo sang nagkalain-lain nga sector ang maga-upod sa Earth Hour kabahin na diri ang DILG kag mga barangay nga magapatay sang ila suga kag mga electrical equipment bilang pagbuylog sa kampanya para sa environment.