Isa ka genuine nga Anti Political Dynasty Law ang gina duso sang nagkalain-lain nga sektor karon paagi sa People’s Initiative.
Ang signature campaign angut diri nga patigayunon online sumugod sa bulan sang Setyembre ang ginlunsar sang Dapat isa lang movement sining Hwebes sang hapon sa Shrine of Our Lady of Perpetual Help ukon mas kilala nga Redemptorist Church sa Bacolod City.
Ginsiling ni San Carlos Bishop Gerardo Alminaza sa press conference nga tion na nga liwat ipabatyag ang people power para sa kaayuhan sang tanan.
Paathag ni Karlo Abidanes ang executive director sang Simbahang Lingkod ng Bayan nga ang gina duso nila nga Anti-Political Dynasty Law ang maga limit sang mga political families sa isa lamang ka elected official sa national position kag isa sa local position.
Maga lakip ini sang ban sa mga mag parientehanay sang tubtob sa fouth degrees sang consanguinity kag affinity, maga dumili sang succession, replacement ukon switching sang mga position sa mga mag himata kag one-term cooling off period matapos nga malab-ot ang term limit suno kay Abidanes.
Kinahanglan ang 3 percent sang lagda sa kada legislative district. May 254 tanan ka legislative district. Mga 7 to 7.5 million ka lagda ang kinahanglan. Kun malab-ot ini may referendum kag maga boto.
Kun makuha ang 50 percent plus one may laye na. Indi na kinahanglan mag agi sa kongreso ukon sa presidente.
[sibwp_form id=1]