
Makatlo ka beses humalin kagab-i nag buga sang abo ang bulkan Kanlaon.
Suno sa Philippine Institute of Volcanology and Seismology na record ang una nga pag buga 10:06 pm tubtob 10:20 pm sang Enero 15. Ang sunod nga pagbuga na record 3:08 am tubtob 6:15 am sini nga adlaw, Enero 16. kag ang ikatlo naman nga pag buga na-record 9:16 sang aga.
Suno sa PHIVOLCS ang emission nagtuga sang grayish plumes nga may kataason nga 500 meters antes napalid sa southwest nga direction. Suno kay Mari-Andylene Quintia, ang resident volcanologist sang PHIVOLCS sa Kanlaon Observatory nga nabase sa La Carlota City mahimo nga may ash fall sa mga lugar sakop sang La Castellana kag bahin sang La Carlota City. Humalin sang Oktubre nagsugod record sang ash emission ang Kanlaon suno kay Quintia.
Paathag ni Quintia ang ash sampling ang naga padayon para mahibaluan kun may magmatic content ini.
Ang December 9 nga eruption suno sa iya may yara sang high percentage sang magmatic activity.
Nagakasayuran nga ang mga ash nga nakuha sadto indi lang gikan sa mga daan nga materials kundi may fresh materials gikan sa magma.
“Ang December 9 nga eruption amo ang may medyo high percentage sang magmatic activity. Kumbaga ang mga ash naton nga nakuha indi lang siya mga old nga materials ang nakita didto kundi may percentage sang fresh nga materials from the magma nga ginhalinan”, suno kay Quintia.
Samtang, ginbisita man kahapon sang pamuno sang Office of the Civil Defense ang mga evacuees sa Canlaon City kag La Carlota City. Si USEC Ariel Nepomuceno ang nag hinun-anon sa ila kag gin paathag nga iya nahangpang ang ila sitwasyon, pero kinahanglan nga mag pabilin sila sa evacuation center para sa ila nga safety. Sila ang gin pasalig man sang padayon nga suporta sang gobyerno.