Ini ang video sang aktwal nga pag-rescue sang katapo sang Bago City Bureau of Fire Protection kay Rudy Villanuvea aka Superman sang siya ang mahulugan sang sanga sang kahoy sa gwa lang sang ila balay sang nag igo ang Bagyo Odette, Disyembre 16 sang gab-i.
Suksok pa niya ang Superman costume sang matabo ang insidente.
Pilason kag indi na makatindog si Rudy sang ginhingaw siya sa ospital.
Utility personnel sa Bago City Hospital si Rudy. Bangud wala siya sang ikasarang sa iya pagpabulong, naghinyo sang bulig ang iya mga magulang.
Ang mga lokal nga opisyales sang siudad ang nagpalab-ot sang bulig sa iya pati na ang mga negosyante.
Mga netizens kag bisan ang iya mga fans ang naghatag man sang donasyon para pangmbakal sang diapers, pagkaon kag bulong.
Masami makita si Rudy sa dalanon nga naga suksok ang Superman costume. Gani madamo ang nagakalingaw sa iya kag nagapicture pa bangud kaangid niya ang idolo nga superhero character.
Tuman naman ang iya pagpasalamat ilabi na sang iya pamilya sa bulig nga ila nabaton sa amat amat nga pagrecover ni Rudy sa mga pilas kag injury nga iya naagom sa aksidente.
Na bed ridden si Superman bangud sang insidente.
Bwas ang schedule ni Rudy para mag-check up sa ospital sa Bacolod.
Nagalaum siya nga liwat nga makabangon para man sa madasun niya nga pagbalik sa dalanon.