Katapo sang multi-billion shrimp industry nagatuyo nga mapabaskog pa ang local production sang pasayan kag lukon kag ang pag export sini sa iban nga pungsod.
Nagapabilin nga self-sufficient ang shrimp industry makaligad man sang kapin tatlo ka dekada humalin nga nagsugod ang pag-diversify sang mga shrimp kag prawn producers halin sa sugarcane production sa Negros.
Sa record sang Philippine Statistics Authority nagalab-ot sa masobra 88,000 metric tons ang combined productions sang pasayan gikan sa aquaculture kag inland fisheries sa pungsod sang 2022.
Pero nagapati si Joseph Edgar Sarrosa, presidente sang Philippine Shrimp Industry Incorporated nga mas mataas pa sa 88,000 metric tons ang ila production humalin nga nagsaka man ang produksyon sang vannamei nga isa sa mga sahi sang lukon nga gina-culture sa pungsod.
Kaupod ang Bureau of Fisheries and Aquatic Resources tinutuyo sang industriya nga mapabaskog pa ang produksyon sang pasayan kag monodon nga isa man ka sahi sang lukon nga sarang ma-export sa iban nga pungsod.
Sa ginpatigayon nga 14th Shrimp Congress sa Bacolod nga gintambungan sang kapin 600 ka mga producers kag exhibitors upod ang mga provincial kag local officials sang probinsya, ginpalab-ot ni Senate Committee on Agriculture chairperson Cynthia Villar pinaagi man sa iya anak nga si Las Piñas City Representative Camille Villar ang paghatag suporta sa industriya.
Ginmanduan sang senadora ang BFAR nga maghimo sang tikang nga mapangapinan ang multi-billion industry sa epekto man sang climate change.