Nagsugod na ang pagdagsa sang mga pasahero sa North Bus Terminal sa Bacolod Miyerkules sang aga.
Gani nagtalana na sang help desk ang katapo sang Bacolod City Police Office sa lugar.
Ginhugtan man sang tagdumalahan sang bus terminal ang seguridad pati ang pagpasiguro nga wala naka-inom ang mga drayber nga magabyahe karon nga Semana Santa.
May gintalana nga standby bus units enkaso magdamo pa gid ang mga pasahero ilabi na sa Huwebes kag Domingo.Pwede i-byahe ang mga hinuptanan sakay sa mga bus.
Pero base sa guidelines sang bus terminal, dapat naka-sulod sa carrier ang mga ido ukon kuring nga naka-diaper.
Magluwas sa bus terminal, naka heightened alert na ang katapo sang Northern Negros Occidental Coast Guard nga gin-deploy sa mga seaport sa pila ka mga lugar sa probinsya.
Magatalana naman sang Motorists Assistance Centers ang Department of Public Works and Highways upod sa BFP kag HPG para magbulig sa mga magabyahe nga motorista karon nga Semana Santa.