Mahimo nga ipalubong na lang suno sa Victorias PNP ang lalaki nga nasapwan patay sang Dominggo sa likod sang plaza sa Barangay 19-A sa Victorias City.
Suno kay Police Lt Col Eduardo Corpuz, may mga pamilya na nga nag kadto sa police station agud hibaluon kun bala ila himata ang ginpatay nga lalaki pero wala sa ila sang may nakakilala sang bangkay.
May mga nakuha nga impormasyon ang PNP suno kay Corpuz nga taga Silay ukon Bacolod ang lalaki pero wala pa ini nila ma kumpirma
Ang lalaki ang nasapwan nga naka higot ang tiiil kag kamut kag natabunan sang plastic ang guya. May note pa ini nga “I love drugs”.
Pero suno kay Corpuz lain nga motibo ang ila gina tutukan kag indi ang iligal nga droga.
Posible pag timalos amo ang motibo sang suspek sa pag patay sa biktima bangud sang brutal nga pag patay diri nga gin utod pa pati ang iya dalunggan.