Saliva test para sa COVID-19 ang mahimo man mangin available sa mga Biomolecular laboratories sang philippine red cross sa mga probinsya sa ti-on nga maaprabuhan na ini sang Department of Health.
Ginpahayag ni Philippine Red Cross Governor Jay Jalandoni nga nagapadayon pa ang pilot testing sang saliva test sa Metro Manila antes ini pahanugutan sang DOH nga mahimo na magamit para sa publiko.
“As to when mag abot diri waay lang kita kabalo pero if the question is malab-ot diri definitely yes, on all red cross labs once ma approve na ni sya sa DOH i-cascade na na siya sa tanan nga laboratories sang red cross nationwide. Ano ang equipment needed? wala na ni additional equipment needed siguro a little training sa staff naton,” suno kay Jalandoni.
Ang saliva test ang isa ka pamaagi para mahibaluan kun positibo sa COVID-19 ang isa ka persona pinaagi sa iya nga laway.
95 porsiento man nga accurate ang result sini kasubong sa RT-PCR test kag mas barato bangud nagabili lamang ini sang duha ka libo ka pesos.
Gindugang pa ni Jalandoni, wala na sang kinahanglan nga dugang nga equipment para sa saliva test bangud mahimo ini magamit sa RT-PCR machines sa mga biolabs sang Philippine Red Cross.
mas mahapos ini bangud indi na kinahanglan sang personal protective equipment ang mga medical personnel nga magakuha sang specimen gikan sa magapa-test.