Nakabunggo sa railings kag nagsaka sa sidewalk sa atubang sang San Sebastian Cathedral, dalan Rizal sa syudad sang Bacolod, ang MG ZS nga subcompact crossover SUV, kaina pasado las dos sang kaagahon.
Suno sa traffic investigation, nag-away ang lalaki nga driver kag ang iya pasahero nga babaye, rason nga nawarik ang manibela sang salakyan pakadto sa sidewalk.
Bangud sang impact, nawasak ang makina sang salakyan, pati na ang railings sa higad sang dalan.
Gindala sa Riverside Hospital ang babaye nga pasahero nga nakaangkon sang samad sa iya agtang.
Samtang, nakapanghimos lang gid sang iya hiligdaan kag nakahalin ang isa ka manug-pakalimos antes nagbunggo ang salakyan. Ang lugar sang insidente amo ang ginaplastaran kag ginatulogan sang nasambit nga manug-pakalimos.
Ginsiling ni Police Major Elmer Bonilla, pamuno sang Bacolod Traffic Enforcement Unit, kinahanglan nga bayaran ukon ipakay-o sang mga imbulbado ang naguba nila nga mga street barriers, nga ginapanag-iyahan sang syudad.
Naghalin ang salakyan sa Barangay Villamonte kag padulong kuntani sa Barangay 36.
