May assumption of jurisdiction na ang Department of Labor and Employment sa Central Negros Electric Cooperative.
Gani ginadumili anay ang pag-strike nga ginaplano sang Ceneco Union of Rational Employees makaligad nga nagtakop na ang cooling off period sa ila ginpa gwa nga notice of strike.
Pero samtang business as usual ang Ceneco, nagpahayag naman si Third District Representative Francisco Kiko Benitez, vice-chairman sang committee on energy sang Kongreso nga dapat matagaan na sang kasolbaran ang institutional issues sa utility firm kasubong na lamang sa bahin sang financial kag fiscal problems.
Dugang pa niya nga dapat ma-review ang kabilugan sang operation sang Ceneco agud man nga mapaiway ang ano man nga kapaltahan sa bahin sang pagdumala kag serbisyo sang utility firm sa mga member consumers.
Sa Pebrero katorse, natalana ang virtual meeting sa tunga sang katapo sang CURE kag Ceneco management upod sa DOLE agud nga ma-istoryahan ang nagluntad nga labor dispute.
Suno kay Stefanie Montaner, presidente sang CURE, igapalab-ot nila sa DOLE ang kapaslawan sang Ceneco managementnga ipatuman ang dugang nga saka sa sweldo para sa rank and file employees, allowances kag signing kag loyalty bonus nga nakasaad sa Collective Bargaining Agreement.
Ginpahayag naman ni Malou Parroco, pamuno sang Member-Consumers Integrated Services Division sang Ceneco nga wala mapatuman sang management ang CBA bangud sang advisory sang National Electrification Administration nga dapat nalambot nila ang 95 collection efficiency rate.
Yara sa 93.27 percent ang collection rate sang Ceneco tuga man sang epekto sang pandemic.