Shadow

Mayor Ella Garcia-Yulo pabor sa pagpaidalom sa areas of concern sa Moises Padilla

Moises Padilla LGU photo

Sa peace covenant signing sa banwa sang Moises Padilla, Martes sang aga, militar kag PNP ang nagpasalig nga sila ang lubos nga maga patuman sang laye kag magabuhat sang ila tagsa ka katungdanan para mapasiguro ang matawhay kag malinong nga eleksyon sa banwa.

Na categorize sang Comelec ang Moises Padilla sa areas of grave concern sini nga 2022 elections. Sang 2019 nga piniliay napaidalom ang banwa sa Comelec control bangud sang intense political rivalry kag mga natabo nga kalakasan nga ginakabig poltically motivated.

Suno sa pamuno sang 62nd Infantry Battalion sang Philippine Army nga si Lt Col Melvin Flores, kuntani nakatuon na ang tagsa tagsa sa mga hitabo sang nagliligad kag ipaiway na ang kalakasan.

Sa karon suno kay Flores dapat nga mapamatud-an nga wala na sang ginamo sa banwa.

Suno naman kay Major Randy Babor ang pamuno sang PNP sa banwa, wala sila sang may na monitor nga private armed groups sa lugar bisan pa mga lihok sang mga rebelde sa kabukiran.

Suno kay Mayor Ella Garcia-Yulo, may balasehan kun ngaa ginkabig nga red category ang Moises Padilla pero isa man sa gina lantaw niya nga bentaha amo nga matutukan sang militar kag pulis ang banwa.

“Isa lang ginalantaw ko advantageous sa amon kay ginatutukan kami sang Army, PNP, RMFB ma make sure nila nga mangin safe gid ang amon election. Nga mapabutyag gid sang tawo kun sino ang ila nga gusto botohon. Amo na ang advantage dira,” suno kay Garcia-Yulo.

Kun bala may mga patimaan pa nga mahimo may gamo sa sini nga piniliay, suno sa alkalde indi man lubos nga mapat-od ang sitwasyon.

“Indi lang ta magsalig kay ang tawo sa likod wala ta kabalo kun ano ang iya plano kay sang nagligad nga eleksyon siya man na ang kawsa,” suno kay Garcia-Yulo.

Sa peace covenant signing ginpanawagan ang kooperasyon sang 34 ka mga aspirants nga sundon ang ginpromisa nila para matigayon ang malinong kag patas nga piniliay.

Secured By miniOrangeSecured By miniOrange