Nakabaton sang nanari-sari nga reaksyon sa publiko ang 62 million pesos nga pondo para sa pagpatukod sang modernized nga Multi-Purpose Building sa Barangay Sum-ag sa Bacolod City.
Ginklaro ni Punong Barangay Rodney Carmona sa Digicast Negros nga indi man “overpriced” ang proyekto bangud ini ang mangin pinakauna nga Multi-Purpose Building sa siudad nga may mga moderno na nga mga pasilidad.
Suno sa iya, natapos na ang 10 million pesos nga first phase sang construction amo man ang 12 million pesos para sa second phase.
Sa karun, may dugang nga 40 million pesos para sa ulihi nga phase sang construction kag natalana ini mga masugod sa una nga semana sang Agosto.
Dugang sang Punong Barangay, nalakip na sa 62 million pesos nga budget ang pagbutang sang mga equipment kag moderno nga basketball court.
May mga CCTV man nga ibutang sa gwa kag sulod sang building. Sa idalom sang patukuron nga bleachers, may walo ka mga kwarto nga ipahamtang nga pwedi himuon opisina ukon para sa mga atleta nga magamit sang pasilidad.
Plano man sang Barangay nga magbutang sang “mini gym” sa amo nga pasilidad kun sa diin maka-exercise ang mga residente.
ESJ and Sons Construction and Construction Supply, Inc. ang contractor sang amo nga proyekto.
Ginapaabot nga mabuksan na amg pasilidad para sa mga residente sang Barangay Sum-ag sa masunod nga tuig.
[sibwp_form id=1]