Patay ang isa ka pulis matapos siya gin tiro sa nabukid nga bahin sang Barangay Patun-an sa banwa sang Calatrava sang Sabado sang gab-i.
Ang gin patay amo si Police Staff Sargeant John Daniel Gotera nga residente sang siudad sang San Carlos kag karon na assign sa Investigation Section sang Toboso Police Station.
Sa imbestigasyon sang Calatrava PNP, naga panglakaton lang sa barangay road si Gotera sang siya ang gin banggaan sang wala pa makilala nga suspetsado kag gintiro sang duha ka beses sa ulo.
Patay na sang mag abot sa ospital ang pulis.
Nakuha sa crime scene ang isa ka basiyo sang 45 calibre pistol.
Ginahibalo pa karon sang Calatrava PNP kun ano ang motibo sa pag patay sa kay Gotera.
Ang hepe naman sang Toboso PNP nga si Captain Kenneth Magan ang nag siling nga sila ang mapatigayon man sang separado nga imbestigasyon angut sa pag patay sang ila nga kaupod.
Ila hibaluon suno kay Magan kun bala may kaangtanan san trabaho ni Gotera ang pag patay sa iya ukon siya ang gin target sang mga rebelde.