Magabaton sang financial assistance ang pulis nga taga Kabankalan City nga napatay sang makabunggo ang iya ginamaneho nga motorsiklo sa truck.
Kabahin siya sa mga pulis nga nagbulig sa pagpasiguro sang peace and order sa Masskara Festival sa Bacolod.
Kabahin si Police Corporal Reden Agus, 31 anyos sa mga pulis nga nag-augment agud mapabaskog ang peace and order sa MassKara Festival sa siudad sang Bacolod.
Papauli na siya kuntani sa Kabankalan City sang Lunes sang kaagahon sang makabunggo ang iya ginamaneho nga motorsiklo sa truck sa national highway sakop sang Barangay San Juan sa banwa sang Pontevedra.
Tungod sang naangkon nga mga pilas, wala na matabangan pa si Agus kag napatay.
Gina-usisa man sang Pontevedra PNP kun may ginlikawan nga ido sa dalan ang pulis amo nga naglapaw siya sa pihak nga lane kag nagbunggo sa nasugata nga truck.
Nakalab-ot man kay Mayor Albee Benitez ang natabo kag nagpadala sang bulak ang siudad sa nalisdan nga pamilya sa pag pakig-unong, ilabi sa iya misis nga nagabusong.
Dugang sang alkalde nga magabaton man sang financial assistance ang napatay nga pulis. Si Agus ang na-assign sa Iloilo Police Provincial Office.