Ginpaathag sang kapulisan nga wala sang may nakasaga-id sa motorsiklo sang isa ka beauty contestant nga naaksidente sa dalan Circumferential sa Barangay Bata sa siyudad sang Bacolod.
Ginsiling ni Police Lt. Col. Ramel Sarona, pamuno sang Traffic Enforcement Unit, nga wala sang indikasyon nga nasaga-id ukon may mga gasgas ang motorsiklo sang biktima.
Sandig sa traffic investigation, ginbawian sang kabuhi si Rahsel Tayco, 22 anyos, kandidata sang Barangay E Lopez para sa Lin-ay sang Silay 2025, matapos makabunggo ang ginasakyan nga motorsiklo sini sa pang-ulihi nga bahin sang truck nga naga-park sa walkway, sa higad sang dalan.
May mga witness man ang kapulisan sa area nga naghambal nga wala sang may nakasaga-id sa biktima.
Suno kay Sarona wala sila sang may nakuha nga closed-circuit television camera footages sa lugar bangud kampo ang kilid sini.
Gin-release naman ang driver sang truck matapos mag-lapse ang reglementary period.
“Kung masagaid na ya, duha ka motor matumba gid na ang duha ka motor. Tapos once masagaid na ya, may impact gid na, may damage gid na kilid or likod sang motor which is wala may makit-an. Tapos kung pamangkuton namon sila kung ano ang color sang motor, wala. Ano color sang bayo sang driver sang nakasagaid, wala. Ano color sang helmet, wala. Ano ang model sang motor, wala. So ano ang imbestigaron namon?”, suno kay Sarona.