Ginreklamo sa Police Station 4 sang isa ka 30-anyos nga aplikante sa Bacolod City ang isa ka pulis nga nagpasalig sa iya nga makasulod siya sa recruitment sang Philippine National Police kabaylo sang kwarta.
Sa impormasyon sang Bacolod City Police Office, isa ka babaye nga pulis ang ginareklamo. Isa ka Non-Commisioned Officer ang pulis nga na-assign sa Police Regional Office Negros Island Region ang gina tumod sa complaint.
Suno kay PRO-NIR Director Police Brigader General Romano Cardiño, 10,000 pesos ang una nga ginbayad sang aplikante sa pulis kag nanukot pagid ini sang dugang nga 40,000 pesos.
Posible man suno sa iya nga nagpasugot nalang ang aplikante nga magbayad bangud ini ang last chance na niya nga makasulod sa recruitment bangud sa iya edad.
Dugang ni Cardiño, sang nagpagwa sang listahan ang PNP sa mga nakapasar sa neurological examination, nakita sang tagreklamo nga wala ang iya ngalan, rason nga nagpasaka ini sang complaint.
Sa karon, ginpaidalum na sang PRO-NIR sa restrictive custody ang pulis kag ginpasurrender na ang iya armas samtang nagapadayon pa ang imbestigasyon sa amo nga kaso.
Nagpagwa man sang statement si PNP Chief Police General Jose Melencio Nartatez Jr., nga nagapasiguro sa publiko nga zero-tolerance ang kapulisan batuk sa kaangay sini nga mga insidente.
Suno sa iya, kun mapamatud-an ang reklamo, pasakaan sang nagakaigo nga kaso ang pulis.
Nagapahanumdum ang pamunuan sang PNP sa mga recruitment officers nga likawan ang amo nga systema agud mapabilin ang kredibilidad sang kapulisan.
“Sa ating recruitment service, sa mga pulis na nakabantay diyan, sana paigtingin niyo pa ang pagbabantay sa mga ganitong insidente para hindi masira ang ating kredibilidad sa pag re-recruit. We practice nameless, o hindi natin kilala kon sino ang aplikante natin basta tingnan natin yung qualifications nila. Kung sino lang ang makakapasa sa standard natin, yun lang talaga ang dapat makapasok sa PNP”, suno kay Cardiño.*
[sibwp_form id=1]