P50M nga dugang nga saka sa BacCHP dako nga bulig sa pagpahagan-hagan sang posible epekto sang “zero subsidy” sa PhilHealth sa madasun nga tuig.
Kapin P800M nga pondo ang gintalana sang Bacolod LGU para sa health services sa 2025.
Kabahin na diri ang para sa Bacolod Comprehensive Health Program ukon BacCHP nga nadugangan sang P50M halin sa P80M sang sini nga tuig.
Nagapati si Councilor Claudio Puentevella, pamuno sang Committee on Health nga dako nga bulig ang dugang nga pondo sa BacCHP agud nga mapahagan-hagan ang kabalaka nga sarang matuga sang ginaduso nga zero subsidy sa Philippine Health Insurance System sa madasun nga tuig.
Ginduso sang Kongreso ang zero subsidy sa PhilHealth bangud sang kapin P60B nga excess funds ukon ang pondo nga wala magamit sini nga tuig magluwas sa binilyon ka pesos pa nga surplus, reserves kag investment funds.
Gin-ratify na sang kongreso ang kapin P6.35T nga national budget.
Pero ginalauman sang kampo ni Senator Imee Marcos nga indi mapirmahan sang iya utod nga si Presidente Ferdinand Marcos, Jr. ang proposed national annual budget.
Ginpahayag ni Atty. Mark Simondo, Chief of Staff sang senadora nga magluwas unconstitutional indi pwede madulaan sang budget ang PhilHealth nga amo ang ginasaligan sang yara sa emerhensya nga nagakinahanglan sang bulig.