Padayon ang regular nga monitoring sa mga manok kag pato sa Sipalay City angut sa kampanya nga mapabilin nga bird flu free ang probinsya.
Sa report sang Plant and Animal Health Surveillance Section sang Department of Agriculture Region 6 gin patigayon ang regular nga negative and sero-surveillance para sa Avian Influenza sa Jordan, Guimaras, Concepcion, Iloilo kag Sipalay diri sa Negros Occidental sadtong Enero 9 tubtob 19.
Kabahin ini sang strategies nga gina patuman para mas mapabaskog ang monitoring para mapangapinan ang poultry industry.
Ang Negros Occidental ang may 8-billion peso poultry industry nga naga lakaip sang broiler kag native chicken, game fowl kag layer kag duck sector.
Suno kay Provincial Veterinarian Dr Placeda Lemana, sa karon wala sang sightings sang migratory birds sa Sipalay. Labing naga bantay ang probinsya para mapangapinan ang industriya.
Regulated ang pag pasulod sang buhi nga mga manok sa probinsya.
“Ang province is bird flu free. As much as possible gina try gid naton nga indi kita masudlan kay kun masudlan kita maguba ang aton nga game fowl industry. Plus kita daan daku kita nga producer sang broiler kag tungod nga chicken eater ang Negrosanon”, suno kay Lemana.
Sa mga bird flu free areas naga require sang laboratory test result nga nag gikan ini sa bird flu free farms.
Pero sa mga lugar nga may kaso sang bird flu suno kay Lemana wala sa gihapon naga tugot sang pag pasulod gikan sa sini nga mga lugar kaangay sang Luzon kag Mindanao.