Gina tutukan man sa karon sang probinsya ang tikang nga ipatuman sa banwa sang La Castellana kasunod sang mortality sa baboy nga na record sa banwa.
Suno kay Negros Occidental Governor Eugenio Jose Lacson, malawig naman kuntani ang tion nga wala sang na record mortality sa baboy sa bilog nga probinsya. Kasunod sang mortality nga na report una sang bulan sang Setyembre sa banwa, suno kay Lacson gina lantaw man nga maga apekto ini sa recovery man sang mga kaiping nga lugar kasubong sang La Carlota City bisan pa sang Bago City.
Ang pagkapatay sang baboy tuga sang hog cholera kag ASF suno kay Lacson. Pero ang mga lugar nga naga pabilin nga wala sang may na report nga mortality padayon sa pre-sentinelling para mahandaan ang sentinelling nga mahimo sa Enero na.
Luyag sang probinsya nga mapadasig man ang recovery pero ang pamaagi dapat sundon nga wala sang short cut suno sa gobernador. Suno kay Lacson nahangpan man nila ang sitwasyon sang mga hog raisers nga madugay na nga gusto man maka tibawas.