Padayon ang pagsaka sa presyo sang manok sa probinsya. Nagsaka man ang presyo sang baboy.
Ini sandig sa June 27 nga price monitoring report sang Provincial Veterinary Office.
Nag lab-ot na ang average price increase sa P3.20 sa kada kilo sang manok.
Ang kilo karon nagdangat na sa sa average price nga P 205.86.
Ang syudad naman sang Victorias ang gapanguna gihapon sa listahan nga may pinakamataas na presyo sang manok sa probinsiya nga naga lab-ot na sa 245 pesos per kilo.
Suno kay Provincial Administrator Rayfrando Diaz, ang pagmahal sa presyo tuga sang pagmahal man sang feeds, ang padayon nga pagsaka sa presyo sang produkto petrolyo kasubong man ang manubo nga supply sang manok sa market.
P267.86 naman ang average nga presyo sang baboy sa kada kilo subong.
Ini ang nagsaka sa P2.11 sa average.
Ang syudad sang San Carlos ang may pinaka mahal nga average price sang baboy nga yara P315/kilo.
Samtang, suno kay Diaz, isa sa mga plano karon sang administrasyon nga ang kadutaan nga ginapanag-iya sang probinsiya nga nagalab-ot sa mga 200 hectares ang paga-gamiton sa pag pasanyog pa gid sang agrikultura, lakip na livestock bilang kabahin sang food security program.
Plano man suno kay Diaz nga ang probinsiya maga subsidize sang labor fee sa mga maga trabaho diri kag magahatag man sang equipment para sa amo nga programa.