Tuman ka daku sang ginsaka sa presyo sang kuryente sa spot markets sa Visayas kag Mindanao sini nga August 2026 nga period.
Ini ang mga ginakuhaan sang supply sang kuryente sang mga electric companies kag cooperatives.
Sa Visayas nga naga lakip sang isla sang Negros nga halos adlaw-adlaw gina brownout sa sulod sang pila na ka semana, masobra sa P7/kWh ang ginsaka sa average market price.
Mahimo maglab-ot sa P18.59 per kilowatt-hour ang presyo sang kuryente halin sa P11.29 per kWh sang nagligad nga bulan.
Sa Mindanao naman, masobra sa P9/kWh ang ginsaka sa market prices.
Pero sa Luzon, nagnubo ang presyo sang kuryente sa merkado.
Ang kulang nga supply sa kuryente kag dako nga demand para diri amo ang ginatudlo nga rason sa pagsaka sang bili sini.
Ginapaabot nga sa sini nga bulan sang Setyembre maga reflect sa bill sang mga konsumedor ang ini nga dugang nga balayran sa kuryente.
Masami kun mag amo sini kadako sang saka sa bili sang kuryente naga pangabay ang mga electric company kag mga kooperatiba nga staggered ukon amat-amaton lang ang pagpatuman sang saka sa bills sang konsumedor.
Ugaling halin sa nagligad pa nga mga pagsaka man sa bili sang kuryente may pending pa nga inugpasaka sa balayran sa kuryente.
Kun mapatuman na ang saka sa balayran, nagakahulugan nga wala labot sa pag antus sa adlaw-adlaw nga brownouts dugang pa gid nga palas-anon para sa mga konsumedor ang tuman ka taas nga bili sang kuryente.
[sibwp_form id=1]