Presyo sang kalamay sa mga sugar mill ang nagnubo. Kabahin sa mga ginaduso nga tikang ang pagpasanyog sang produksyon paagi sa climate-resilient variety sang tubo.
Nagahamboy na lang karon sa kapin P2,800 per 50 kilogram ukon sako ang mill gate prices sang raw sugar sa mga sugar central.
Nangin kabahin sa ginatan-aw nga kabangdanan sang Sugar Regulatory Administration sa amat-amat nga pagnubo sang mill gate prices amo ang epekto sang climate change.
Gani paagi sa ginapatuman nga sugar consumption study upod sa Philippine Statistics Authority ginapaabot nila mapasanyog ang research and development program para matigayon ang pag-develop sang mga high-yield kag climate-resilient nga variety sang tubo.
Sang nagligad nga inadlaw, ginbisita man ni Victorias City Mayor Javier Miguel Benitez ang Philippine Sugar Research Institute Foundation Inc. ukon PHILSURIN sa Silay City.
Nalakip sa gin-introduce nga variety sang PHILSURIN sa alkalde ang PSR 03-171 nga ginapatihan makapabaskog sang sugar production sa pihak sang epekto sang climate change nalakip na diri ang halit sang mainit nga panahon.
Ang pag-maximize sang sugar produksyon ang ginaduso man ni Board Member Joeben Alonso nga matun-an agud mapangapinan ang sugar industry.
Nagapati ang pamuno sang Committee on Trade, Industry and Commerce, Investments and Promotions sang Sanggunian Panlalawigan nga may dako nga epekto sa sugar production ang conversion sang mga sugar farm sa mga commercial kag residential properties kag ang pagpahat-pahat sang dalagko nga katubuhan paagi sa agrarian reform program.