Presyo sang bugas sa merkado karon ang nangin estable na kasunod sang milling season.
Suno sa mga retailer sa Burgos Public Market, mabakal sa gihapon ang tag 45 pesos nga well milled rice.
Kahapon ginmando ni Presidente Ferdinand Marcos, Jr., ang pag lift sang price ceiling sa well-milled rice nga 45 pesos kag regular milled rice nga 41 pesos sa kada kilo.
Sa Burgos Public market, suno sa mga rice retailer kay may bilin pa man ang ila nga supply, padayon ang ila nga pagbaligya sang tig 45 pesos kada kilo nga well milled rice kag ini ang labing mabakal.
Pero kay nag ani na, suno sa mga manugbaligya nag-estable naman gid ang presyo sang bugas.
Ang regular milled rice sarang mabakal subong sa 47 tubtob 49 pesos ang kilo kag ang well milled rice naman sa 50 tubtob 51 pesos ang kilo.
Mas barato na kun ipaanggid sa presyo antes sang ani.
Pero indi man ma negar suno sa retailers, nga may mga konsumedor nga naga pangita sang tig 45 pesos nga well milled rice bangud sa paniempo karon suno sa ila daku ang bulig nga makabarato.
Suno sa Department of Trade and Industry – Negros Occidental, 583 tanan ka mga rice retailer sa Bacolod kag Negros Occidental ang tigayon nga naka baton sang subsidy sa gobyerno kasunod sang ila nga compliance sa rice price cap.
Suno kay Lynna Cardinal ang Provincial Director sang DTI ang third batch amo na ang last batch sang tagtaganay sang subsidy.